PRA-PR-85
Dated:30-01-2025
پارلیمنٹیری رپورٹرز ایسوسی ایشن آف پاکستان کے نمائندہ وفد کی تحریک تحفظ آئین پاکستان کے سربراہ محمود خان اچکزئی سے ملاقات
وفد نے محمود خان اچکزئی کو حکومت کے پارلیمان سے عجلت میں منظور کردہ کالے اور متنازعہ قانون پیکا ترمیمی ایکٹ 2025 سے متعلق بریف کیا
محمود خان اچکزئی نے پارلیمانی صحافیوں کے ساتھ ان کی جدوجہد میں بھرپور ساتھ دینے اور تعاون و یکجہتی کا اظہار کیا۔
حکومت نے آئین کو بالا طاق رکھ دیا ہے اور ہر ادارے کے پر کاٹ رہے ہیں، محمود خان اچکزئی
پیکا قانون میں ترامیم لاکر صحافت اور صحافیوں کی آزادی پر وار کیا گیا ہے، محمود خان اچکزئی
تحریک تحفظ آئین پاکستان صحافیوں کے ساتھ کھڑی ہے، محمود خان اچکزئی
اسلام آباد(30 جنوری 2025) پارلیمنٹیری رپورٹرز ایسوسی ایشن آف پاکستان کے نمائندے وفد نے صدر پی آر اے پاکستان عثمان خان کی قیادت میں پختونخوا ملی عوامی پارٹی و تحریک تحفظ آئین پاکستان کے سربراہ محمود خان اچکزئی سے ملاقات کی۔ سیکرٹری پی آر اے پاکستان نوید اکبر نے محمود خان اچکزائی کو متنازعہ پیکا ترمیمی ایکٹ 2025 کی پارلیمان سے منظوری اور صدر مملکت کے عجلت میں دستخط کرنے اور حکومت سمیت پارلیمان میں سیاسی جماعتوں کے بل سے متعلق کردار پر تفصیلی بریفنگ دی۔ صدر پی آر اے عثمان خان نے کہا کہ پیکا ترمیمی ایکٹ 2025 جس انداز سے منظور ہوا اس پر اس بل کی حمایت کرنے والی سیاسی جماعتوں کا کردار جمہوریت میں مشکوک ہوگیا ہے۔ انہوں نے کہا کہ اس قانون کا مقصد سوشل میڈیا کی آڑ میں آزادی اظہار رائے اور صحافیوں کو نشانہ بنانا ہے۔
اس موقع پر محمود خان اچکزئی نے پارلیمانی صحافیوں کے ساتھ مکمل یکجہتی کا اظہار کیا اور کہا کہ موجودہ حکمران آئین پاکستان کی پاسداری کرنے سے قاصر ہیں۔ انہوں نے کہا کہ حکمران تمام اداروں کی آزادی سلب کرنے اور اداروں کے پر کاٹنے میں مصروف ہے اور ہر طبقہ کو پریشان کیا جارہا ہے۔ آئین پاکستان کی پاسداری کرنے اور پاسداری نہ کرنے والوں کی جنگ شروع ہوچکی ہے اور ہم یہ جنگ ہر صورت میں لڑیں گے۔
محمود خان اچکزئی نے کہا کہ تحریک تحفظ آئین پاکستان پارلیمانی صحافیوں کے ساتھ مکمل یکجہتی کرتی ہے اور بھرپور تعاون کرے گی، انہوں نے بتایا کہ 19 جنوری کو جرگہ میں بھی صحافیوں کے حق میں ایک قرارداد پاس کی گئی ہے۔
ملاقات میں تحریک تحفظ آئین پاکستان کے ترجمان اخوانزادہ حسین بھی موجود تھے۔
پی آر اے وفد میں صدر اور سیکرٹری کے ہمراہ سینئر نائب صدر احمد نواز خان، سیکرٹری فنانس اصغر چوہدری، سیکرٹری اطلاعات جاوید حسین، ممبر گوننگ باڈی نادر گورامانی اور سینئر صحافی طارق سمیر نے شرکت کی۔
جاری کردہ:
جاوید حسین سیکرٹری اطلاعات پی آر اے پاکستان۔